Dominik Pllashniku ka rrëfyer historinë e tij, kërkesën dhe brengën e tij në lidhje me bisedën e shefes së grupit parlamentar të Lëvizjes Vetëvendosjes, Mimoza Kusari-Lila me Slavko Simiqin nga Lista Serbe.
I ftuar në emisionin “Rreth e Rrotull”, në RTV Dukagjini, Pllashniku thotë se i ka penguar bieseda e Mimoza Kusarit me Slavko Simiqin.
“Ju e dini që gjuha serbe është gjuha e dytë në Kosovë. Po babi jem nuk ka luftuar që me fol deputetët shqiptarë serbisht. Kjo është çfarë po më vran mu, edhe po i vranë djemtë e tjerë çka i kanë prindërit luftëtarë, po i vrajnë djemtë e dëshmorëve e vajzat e dëshmorëve se si një deputete shqiptare mund të flasë serbisht”, është shprehur Pllashniku.
Pllashniku gjithashtu thekson masakrën e Mejës në Gjakovë, ku thotë se atij po i dhemb shumë se si një deputete nga ai rajon, duke kujtuar këtë masakër, po flet serbisht.
Pllashniku përmend se është njohës i mirë i historisë, sidomos luftërave dhe thotë se këto i ka traditë nga babai i tij.
Ditën e shtunë në vend është mbajtur një protestë e organizuar nga veteranët e Kosovës, ku kjo protestë është organizuar pas publikimit të përgjimeve të bisedës mes Mimoza Kusari-Lilës dhe Slavko Simiqit.