Bashkimi Evropian (BE) të enjten i ka kërkuar Kosovës të sigurojë një periudhë mjaft të gjatë tranzicioni për zbatimin e rregullores së re të Bankës Qendrore të Kosovës (BQK), pasi sipas BE-së rrezikohet të ndërlikohet jeta e qytetarëve të komuniteteve, veçanërisht komunitetit serb.
BE-ja ka thënë se periudha e shkurtër e tranzicionit për zbatimin e rregullores, “e kombinuar me mungesën e informacionit dhe zgjidhjeve praktike për të gjitha komunitetet e prekura, rrezikon të ndërlikojë seriozisht jetën e tyre”.
Kjo deklaratë e BE-së vjen pasi të mërkurën zëvendëskryeministri i Kosovës, Besnik Bislimi, ka thënë se nga sot hyn në fuqi një rregullore e Bankës Qendrore të Kosovës që parasheh që vetëm valuta euro të përdoret për pagesa duke i dhënë fund përdorimit të dinarit serb.
Por, Bislimi ka pranuar se në vend të masave ndëshkuese, Qeveria do të investojë në informim dhe edukim gjatë “periudhës së tranzicionit”.
“Bashkimi Evropian i kushton vëmendje rregullores së Bankës Qendrore të Kosovës, e cila pritet të hyjë në fuqi sot. Rregullorja synon të rrisë transparencën e flukseve financiare, të sigurojë stabilitetin financiar dhe të luftojë pastrimin dhe falsifikimin e parave. BE-ja vëren se rregullorja do të ndikojë edhe në mbështetjen financiare që serbët e Kosovës marrin nga Serbia. BE-ja është e shqetësuar për pasojat që ky vendim mund të ketë në jetën e përditshme të serbëve të Kosovës dhe komuniteteve të tjera në mbarë Kosovën për shkak të mungesës së konsultimeve paraprake, veçanërisht për ndikimin e tij në shkolla dhe spitale, duke pasur parasysh mungesën e dukshme të alternativave në këtë moment. Periudha e shkurtër e tranzicionit për zbatimin e rregullores, e kombinuar me mungesën e informacionit dhe zgjidhjeve praktike për të gjitha komunitetet e prekura, rrezikojnë të ndërlikojnë seriozisht jetën e tyre”, thuhet në komunikatën e BE-së.
BE-ja tutje i kërkon Kosovës të gjejë një zgjidhje të negociuar për çështjen e “tranzicionit të gjatë” në kuadër të dialogut të mbështetur nga BE-ja.