Policia e Kosovës ka bërë të ditur se ka arrestuar një person, nën dyshimin se ka rrëmbyer një person tjetër dhe për lirimin e tij ka kërkuar 30 mijë euro.
Siç njofton Polica, arrestimi i të dyshuarit dhe lirimi i viktimës ka ndodhur brenda pak minutash pas raportimit.
“Arrestohet një person i dyshuar për veprën rrëmbim Zyrtarët policor të Njësitit të Hetimeve të Përgjithshme të Prishtinës, në asistim të Njësitit për Reagim të Shpejtë, kanë arrestuar një person të dyshuar për veprën rrëmbim. Rasti është raportuar sot rreth orës 18:30, ku personi i dyshuar ka rrëmbyer një person, për lirimin e të cilit nga familjarët e viktimës ka kërkuar një shumë parash (30000 euro). Arrestimi i personit të dyshuar: Sh. K.mashkull, 23 vjeç , shtetas i Republikës së Kosovës, dhe lirimi i viktimës ( në gjendje të mirë shëndetësore), është bërë pak minuta pas raportimit si rezultat i një pune intenzive hetimore, të cilën zyrtarët policor e kanë ndërmarrë në bashkëpunim me prokurorin e shtetit”, njofton Policia.
Gjithashtu, Policia ka bastisur lokacionin ku është mbajtur viktima dhe aty janë gjetur e sekuestruar; 1 armë, 1 thikë, 1 sëpatë si dhe gjësende të tjera.
“Pjesë e aksionit policor ka qenë edhe bastisja dhe ekzaminimi i lokacionit ku është mbajtë viktima, aty janë gjetë dhe sekuestruar: -1 armë -1 thikë -1 sopatë si dhe gjësende të tjera. Po ashtu me vendim të prokurorit është konfiskuar edhe një veturë. Aktualisht hetuesit policor në koordinim me prokurorin e shtetit, janë duke kryer veprimet e nevojshme procedurale”.
