Qeveria e Kosovës ka bërë të ditur se interesimi i qytetarëve për të shfrytëzuar shërbimet elektronike të sapolansuara në platformën E-Kosova, është rritur.
Përmes një postimi në Facebook, Qeveria e Kosovës ka bërë të ditur se brenda tre ditësh, janë shkarkuar rreth 20 mijë certifikata të gjendjes civile.
“Interesim i lartë i qytetarëve për të përdorur shërbimet elektronike të sapo lansuar në platformën E-Kosova. Në vetëm tre ditë, janë shkarkuar rreth 20 mijë certifikata. Do të vazhdojmë me digjitalizimin e shërbimeve duke synuar shërbime më efikase, më cilësore e më të qasshme”, ka shkruar Qeveria e Kosovës, në Facebook.
Tutje, një njoftim thuhet se “nga e enjtja e javës së ardhshme certifikatën e lindjes, ekstraktin e lindjes, certifikatën e martesës dhe certifikatën e vdekjes, si dhe shërbimin për vazhdimin e regjistrimit të veturës dhe rezervimin e targave mund ta bëni në https://ekosova.rks-gov.net/Service/12”.
E-Kosova është platformë shtetërore ku shërbimet publike që gjenden në zyrat dhe sportelet fizike të institucioneve ofrohen në mënyrë elektronike.