Instituti Kombëtar i Shëndetësisë Publike (IKSHPK), ka bërë të ditur se bazuar në të dhënat e tyre gjatë javëve të fundit kanë vërejtur një rritje të rasteve me grip dhe infeksione respiratore.
Kësisoj, IKSHPK-ja bën të ditur se është rritur edhe numri i rasteve që kërkojnë ndihmë mjekësore dhe hospitalizim, njofton Dukagjini.
Mes tjerash, qytetarëve u është bërë thirrje që së bashku me familjarët e tyre, të drejtohen pranë qendrave të mjekësisë familjare për t’u vaksinuar.
“Në këtë kontekst, ju bëjmë thirrje qytetarëve që të tregojnë kujdes të shtuar dhe të vaksinohen kundër gripit sezonal, si masa më efektive për parandalimin e sëmundjes dhe komplikimeve të saj. Edhe pse sezona e gripit ka filluar, vaksinimi është ende i dobishëm, pasi pritet që përhapja e gripit të intensifikohet gjatë muajve të ardhshëm. Vaksinimi ndihmon në uljen e rrezikut të formave të rënda të sëmundjes, si dhe në mbrojtjen e grupeve më të rrezikuara, përfshirë të moshuarit, fëmijët, personat me sëmundje kronike, si dhe të gjithë personat nga mosha 6 muaj e lart që dëshirojnë të mbrohen nga gripi dhe komplikimet e tij”, thuhet në njoftim.