Hasan Dakaj, ish-pjesëtar i Ushtrisë Çlirimtare të Kosovës (UÇK), i cili mbahej në burg në Serbi që nga fillimi i janarit 2024, është liruar sot.
Vetë ish-luftëtari i lirisë ishte planifikuar të paraqitej personalisht përmes një linje direkte në emisionin FIVE, por gjendja e tij emocionale pas lirimit e bëri të pamundur këtë. Në vend të tij, foli vëllai i tij, Gëzim Dakaj.
Ai në FIVE në Dukagjinit ka thënë se i vëllai është shumë i emocionuar dhe ende nuk ka mundur të tregojë detaje të mëtejshme se si u trajtua në burgjet e Serbisë.
“Është i liruar prej tërë aktakuzave… për momentin është shumë i emocionuar.
(Është trajtuar) si në Serbi ma. Kush ka qenë atje e dinë. S’po di çka më thënë se ende nuk kemi biseduar me vëllaun, veç sa e kemi parë edhe kemi marrë në kerr dhe po shkojmë në shtëpi dhe ty do të flasim si ka ndodhur gjendja”, ka thënë Gëzim Dakaj.
Hasan Dakaj ishte arrestuar në pikëkalimin kufitar në Merdare më 6 janar 2024 – dhe nga kjo ditë po mbahej në paraburgim.
Ai u akuzua nga Prokuroria e Lartë për Krime të Luftës e Beogradit për gjoja krime lufte kundër popullsisë joshqiptare gjatë luftës në Kosovë në vitin 1999.
Nezir Mehmetaj dhe Tefik Mustafa aktualisht po mbahen në burg në Serbi, nën akuza për krime lufte. Mehmetaj, i cili u arrestua në janar të vitit 2020, u dënua muajin e kaluar me gjashtë vjet burgim. Ndërsa Mustafa, i arrestuar në qershor të vitit 2024, vazhdon të jetë në paraburgim.