Në seancën e radhës të Kuvendit të Kosovës, pritet të votohen pikat e rendit të ditës, të cilat kanë dështuar të miratohen në seancat e kaluara.
Njëra nga pikat që pritet të votohet, në seancën e së martës, e cila ka ngjallur reagime të shumta është ajo për ligjin, i cili përcakton pagën minimale.
Këtë ligj e kanë kundërshtuar fuqishëm organizatat e veteranëve të luftës së UÇK-së, me arsyen se votimi i ligjit në fjalë do t’i linte ata jashtë listës së rritjes së pagës minimale.
Veteranët e luftës, javën e kaluar kishin protestuar para Kuvendit të Kosovës, ku edhe kishin tentuar që me forcë të hynin brenda objektit të Kuvendit, por një gjë e tillë ishte parandaluar nga njësitet e Policisë së Kosovës.
Pas dështimit të votimit të ligjit, protestuesit ishin shpërndarë të qetë.
Kundër ligjit për pagën minimale, i cili nuk e përfshin edhe kategorinë e veteranëve të luftës kanë dalë edhe partitë opozitare, përveç tyre, edhe deputeti i pozitës, Fatmir Humolli, kishte votuar kundër herën e kaluar kur ishte tentuar të votohej një ligj i tillë.
Disa nga pikat e tjera që priten të hidhen në votim janë:
Votimi në parim i Projektligjit nr.08/L-142 për ndryshimin dhe plotësimin e ligjeve që përcaktojnë shumën e beneficionit në lartësi të pagës minimale, procedurat e caktimit të pagës minimale dhe shkallët tatimore në të ardhurat personale vjetore,
Votimi në parim i Projektligjit nr.08/L-143 për ndryshimin dhe plotësimin e Ligjit nr.08/L-066 mbi ndarjet buxhetore për Buxhetin e Republikës së Kosovës për vitin 2022,
Emërimi i Komisionit për Mbrojtjen e Konkurrencës,
Formimi i Komisionit Ad-hoc për përzgjedhjen e kandidatëve për një (1) anëtar të Bordit të Radiotelevizionit të Kosovës, nga komuniteti shqiptar.
Pikat e papërfunduara nga Seanca plenare, mbajtur më 26 maj dhe 6 qershor 2022:
Votimi në lexim të dytë i Projektligjit nr. 08/L-033 për provimin e jurisprudencës,
Votimi në lexim të dytë i Projektligjit nr.08/L-052 për ndryshimin dhe plotësimin e Ligjit nr.05/L-010 për Agjencinë Kosovare për Krahasim dhe Verifikim të Pronës,
Shqyrtimi i dytë i Projektligjit nr.08/L-070 për Pijet e Forta Alkoolike,
Shqyrtimi i dytë i Projektligjit 08/L-010 për Krijimin e Infrastrukturës Kombëtare të Informacionit Hapësinor në Republikën e Kosovës,
Shqyrtimi i dytë i Projektligjit nr.08/L-027 për Mbeturinat nga industritë nxjerrëse të mineraleve,
Zgjedhja e pesë (5) zëvendësve të Avokatit të Popullit,
Zgjedhja e një (1) anëtari të Komisionit të Pavarur për Media.