Operacioni policor antidrogë i koduar “Tranziti”, gjatë mbrëmjes së datës së 15 qershorit ka sekuestruar 45.5 kg lëndë të dyshuar narkotike të llojit kokainë, në një kontenier në Portin e Durrësit.
Në vijim të veprimeve për zbardhjen e tentativës për trafikim të një sasie të madhe të kokainës që vinte tranzit nga Brazili për në Maqedoninë e Veriut, policia shqiptare ka kap falë informacioneve që dispononte nga Policia Kriminale e Drejtorisë Vendore të Policisë Durrës.
”Si rezultat i veprimeve të thelluara, në bashkëpunim me Prokurorinë pranë Gjykatës së Rrethit Gjyqësor Durrës, ky aksion ka rezultuar i suksesshëm”.
Dhe si pasojë e këtij operacioni ”janë arrestuar dy persona: A. F., 30 vjeç, banues në Prishtinë, me detyrë administrator në kompaninë që kishte porositur ngarkesën e mishit të pulës në Brazil, dhe E. V., 39 vjeç, banues në Tiranë, me detyrë agjent doganor i kontraktuar nga kjo kompani”.
Si rezultat i kontrollit të imtësishëm të ushtruar në kontenier, Policia shqiptare në brendësi të ngarkesës me mish pule ka gjetur 40 pako me lëndë të dyshuar narkotike kokainë, me peshë 45 kg e 500 gramë, shkruhet në faqen e policisë të shtetit shqiptarë, në rrjetin social Facebook.