Ministri i Punëve të Jashtme i Serbisë, Nikola Selakoviq, ka deklaruar se Serbia nuk mund të pranojë rezultatet e “referendumit” të organizuar nga Rusia në rajonet e Ukrainës.
Kështu është shprehur ai gjatë konferencës për media, të dielën e 25 shtatorit, ku ka thënë se u përmbahen parimeve të së drejtës ndërkombëtare dhe Kartës së Organizatës së Kombeve të Bashkuara.
“Së pari, ne u përmbahemi parimeve të së drejtës ndërkombëtare dhe Kartës së OKB-së, së dyti, kjo do të binte plotësisht në kundërshtim me interesat tona shtetërore dhe kombëtare dhe politikën tonë të ruajtjes së integritetit territorial, sovranitetit dhe parimeve të paprekshmërisë së kufijve”, ka thënë Selakoviq.
Ndryshe, në katër rajone të Ukrainës, që kontrollohen kryesisht nga Rusia, po mbahen referendumet e rreme ruse, shkruan REL.
Presidenti serb, Aleksandër Vuqiç, ka theksuar më herët se përpjekja e Perëndimit për të përjashtuar Federatën Ruse nga Këshilli i Sigurimit i OKB-së do të ishte “shkatërrim i rendit ndërkombëtar”.
Për shkak të agresionit të saj në Ukrainë, Rusia tashmë është sanksionuar nga Bashkimi evropian, Shtetet e Bashkuara të Amerikës dhe vendet e tjera perëndimore.
Por, Serbia është ajo që ka kundërshtuar ndëshkimin e rusisë me sanksione.