Deputeti i Lidhjes Demokratike të Kosovës (LDK), Driton Selmanaj, ka kritikuar reformat në sistemin e drejtësisë, duke thënë se procesi i vettingut ka dështuar.
Në seancën e së enjtes në Kuvendin e Kosovës, Selmanaj ka thënë se problemi themelor i sistemit të drejtësisë në Kosovë është mungesa e profesionalizmit të tyre.
Sipas deputetit të LDK-së, procesi i vettingut ka nisur në mënyrë të mbrapshtë, pasi edhe rekomandimet nga Komisioni i Venecias, siç thotë ai, nuk janë reflektuar.
“Kam bindjen që ky proces ka nisur mbrapsht, ka nisur një konceptdokument në Komisionin e Venecias me pesë opsione të vettingut, rast i paprecedentë. Për çudi, rekomandimet që kanë dalë nga Komisioni i Venecias, nuk janë reflektuar, që i bie asnjëra nga cështjet që kjo qeveri i ka konsideruar si politika publike, nuk janë reflektuar në amandamente”, ka thënë Selmanaj.
Pozita e opozita janë pajtuar me tri propozim-amendamentet kushtetuese, që kanë të bëjnë me vettingun në sistemin e drejtësisë, të cilat janë shqyrtuar në këtë seancë.
Por, për miratim të ndryshimeve kushtetuese duhen edhe votat e Listës Serbe, e cila është duke i bojkotuar seancat e kuvendit.