Senatori amerikan, Bob Menendez, dha dorëheqje nga pozita pasi u dënua për korrupsion.
Menendez tha në një letër se dita e tij e fundit si senator i ShBA-së do të jetë 20 gushti.
Senatori demokrat nga New Jersey tha se planifikon ta apelojë aktgjykimin dhe se nuk do që Senati “të përfshihet në një proces të gjatë që do ta dëmtonte punën e tij të rëndësishme”.
Guvernatori i New Jersey-t, Phil Murphy, gjithashtu demokrat, do të emërojë tani një zëvendësues për Menendezin, i cili ka shërbyer si senator që nga viti 2006, raporton AP.
Ai ka qenë edhe kryetar i Komitetit me ndikim për Marrëdhënie me Jashtë, por ka hequr dorë nga ky post, pasi është akuzuar për korrupsion, vitin e kaluar.
Menendez, 70 vjeç, u shpall fajtor më 16 korrik për të 16 akuzat penale, me të cilat, ngarkohej, përfshirë pengimin e drejtësisë, mashtrimin dhe zhvatjen.