Mediumi serb nova.rs ka shkruar se në takimin e sotëm të Këshillit të Sigurisë Kombëtare të Serbisë, përveç marrëveshjes që do të punohet për tërheqjen e njohjes së Kosovës, është rënë dakord që të mos ketë ndryshim në qëndrimin e Serbisë për sanksionet ndaj Rusisë.
Siç ka njoftuar gazeta beogradase, vendimi për këtë çështje mbetet në të njëjtin konkluzion, i cili është arritur në seancën e kaluar të Këshillit të Sigurisë Kombëtare në shkurt të këtij viti.
Më pas, Presidenti i Serbisë, Aleksandër Vuçiq ka bërë të ditur se Serbia nuk do të vendosë sanksione ndaj Rusisë, edhe pse këtë e ka kërkuar Bashkimi Evropian.
“Serbia respekton normat e së drejtës ndërkombëtare, por Serbia gjithashtu i kupton mirë nevojat e saj, dhe pavarësisht se çfarë do të donte, Serbia ka interesat e saj jetike kombëtare dhe shtetërore, ajo respekton miqësitë tradicionale”, ka thënë në shkurt Vuçiq.
Sa i përket çështjes së Kosovës, Ministri i Jashtëm i Serbisë, Nikola Selakoviq pretendon se katër shtete ia kanë komunikuar përmes notës verbale se kanë tërhequr njohjen e pavarësisë së Kosovës.
Kjo nuk është hera e parë që Serbia bënë njoftime të tilla, duke tentuar të pengojë anëtarësimin e Kosovës në organizata ndërkombëtare.
Ndryshe, të enjten edhe zyrtarisht Kosova ka dorëzuar aplikacionin për anëtarësim në Këshillin e Evropës.