Shefi i kabinetit të presidentes së Kosovës, Blerim Vela, ka publikuar një dokument, sipas të cilit, Qeveria e Serbisë propagandon për zgjedhjet lokale në veri të Kosovës.
Nëpërmjet një postimi në rrjetin social Twitter, ai ka thënë se dokumenti nga Qeveria serbe është dëshmi e përpjekës për të ndërhyrë në zgjedhjet lokale në veri të Kosovës.
“Kjo është një dëshmi prima facie e përpjekjes së Serbisë për të ndërhyrë në zgjedhjet lokale në veri të Kosovës. Një ndërhyrje e tillë e huaj në zgjedhje, synon të prishë të gjithë procesin zgjedhor dhe të frikësojë serbët vendas që të mos ushtrojnë të drejtën e tyre demokratike për të zgjedhur përfaqësuesit e tyre”, ka shkruar Vela.
Dokumenti i publikuar nga Vela tregon se serbët e Kosovës janë në rrezik dhe kanë nevojë për mbrojtje.
Zgjedhjet në katër komunat veriore pritet të mbahen të dielën e 23 prillit 2023.
“Tendenca për destabilizim në veri të vendit është e kufizuar dhe nuk mund të përhapet në pjesën tjetër të Kosovës apo në rajon”.
Kështu ka thënë ish-kryeinspektori i Agjencisë së Kosovës për Inteligjencë (AKI), Shkëlzen Sopjani, në një prononcim për Portalin Dukagjini.
Kjo deklaratë e tij vjen pasi AKI ka informacione që në Rashkë të Serbisë dy grupe po zhvillojnë trajnime për ta destabilizuar veriun e Kosovës.
Këtë informacion e ka dhënë kryetarja e Komisionit parlamentar për Mbikëqyrjen e AKI-së, Ganimete Musliu, e cila ka thënë se ua ka dhënë drejtori i AKI-së, Petrit Ajeti.
Sipas saj, pjesëtarë të së ashtuquajturës ”Organizatë për Mbrojtje Civile” po trajnohen në Rashkë për gjuajtje me armë e taktizime, që synim kanë të destabilizojnë veriun në prag të zgjedhjeve të jashtëzakonshme.