Deputeti shqiptar në Kuvendin e Serbisë, Shaip Kamberi, ka deklaruar se policia e Serbisë po i bënë presion drejtuesve shqiptarë të institucioneve poblike, kështu duke ngritur disa shqetësime në lidhje me trajtimin e shqiptarëve nga ana e zyrtarëve të Ministrisë së Brendshme të Serbisë.
“Fjala është për tentativë të vazhdueshme të presioneve që po i bëhen drejtuesve shqiptarë të institucioneve publike”, është shprehur, Kamberi.
Kamberi, përmes një postimi në rrjetin social, Facebook, ka thënë se policia e Serbisë ftesën për intervistim e ka paraqitur si arrestim, ku sipas tij kjo mund të jetë mosdije profesionale, apo tendencë qëllimkeqe për frikësim.
Kamberi, gjithashtu ka thënë se një veprim i tillë më shumë i ngjanë ‘një presioni politik’, duke e theksuar që ndodh ‘sidomos para zgjedhjeve’.
“Sot, me qëllim të intervistimit rreth mosshlyerjes së borxheve të qirasë së disa shfrytëzuesve të hapësirës publike në qytetin e Bujanocit, është shoqëruar për t’u intervistuar në polici ish-likuiduesi i ndërmarrjes për ndërtim të Komunës së Bujanocit” ka thënë ai.
Ndërkaq, Kamberi ka shtuar se për t’u intervistuar sipas tij do të mjaftonte një ftesë e zakonshme ndërsa organet shtetërore kanë zgjedhur metodën e shoqërimit në prokurori dhe se Ministria e Punëve të Brendshme (MBP) e Serbisë, ka lëshuar deklaratë se bëhej fjalë për arrestimin e tij.
Ky veprim sipas tij është cilësuar si presion i shpeshtuar politik dhe sidomos para zgjedhjeve e jo për ta luftuar “menaxhimin jo të mirë” të organit gjegjës.
“I gjithë ky spektakël natyrisht përfundoi me mbarimin e intervistimit dhe personi i “arrestuar” doli të jetë shoqëruar vetëm për intervistim” ka deklaruar Kamberi.
Kryetari i Partisë për Veprim Demokratik (PDD) nga Bujanoci, Shaip Kamberi, më 2 maj, i ftuar në emisionin “Debat Plus”, në RTV Dukagjini, ishte deklaruar se nuk do të bëhet pjesë e Qeverisë së Serbisë të udhëhequr nga presidenti serb, Aleksandër Vuçiq dhe politikës të cilën e zbaton ky i fundit.
Përveç kësaj, ai ka theksuar se nuk do të futet në qeverisjen “autoritare” të Vuçiqit derisa Serbia “nuk e ndërron qasjen ndaj Kosovës, derisa Serbia nuk e ndërron Kushtetutën dhe preambulën e saj”.
Shaip Kamberi, kishte fituar sërish mandatin e deputetit në Kuvendin e Serbisë, më 28 prill, ku sipas rezultateve preliminare të dhëna nga Shtabi i Koalicionit të Shqiptarëve të Luginës, rezultati është se nga Koalicioni i Shqiptarëve të Luginës, Shaip Kamberi ka marrë 686 vota, një SNS dhe 11 të pavlefshme.
