Shtetet e Bashkuara të Amerikës (ShBA) janë shprehur të shqetësuara për aksionin e sotëm të policisë në veri ku u mbyllën pesë komuna paralele pasi thuhet se ky veprim “nuk ishte i koordinuar me partnerët ndërkombëtarë”.
Ky aksion nga ambasada amerikane në Kosovë po konsiderohet si “vazhdimësi e aksioneve të pakoordinuara të ndërmarra nga Qeveria e Kosovës, e që vazhdojnë të kenë ndikim direkt dhe negativ në komunitetin serb dhe komunitetet tjera minoritare në Kosovë”.
Sipas ambasadës, këto veprime “pasqyrojnë rritjen e përkeqësimit të marrëdhënieve mes dy vendeve”.
“Shtetet e Bashkuara dhe partnerët tanë ndërkombëtarë kanë kërkuar në vazhdimësi nga Qeveria e Kosovës që të ketë prioritet koordinimin me komunitetin ndërkombëtar dhe të mos ndërmarrë veprime të njëanshme për çështjet në agjendën e dialogut të lehtësuar nga BE-ja. Dështimi i Qeverisë së Kosovës për t’iu përgjigjur këtyre kërkesave reflekton në përkeqësimin real dhe në rritje të partneritetit tonë”, thuhet në njoftim.
Tutje, Ambasada e ShBA-së në Kosovë ka thënë se “veprimet e pakoordinuara” të Qeverisë së Kosovës “i vënë në rrezik më të madh qytetarët e Kosovës dhe ushtarët e KFOR-it, përshkallëzojnë në mënyrë të panevojshme tensionet rajonale dhe minojnë reputacionin e Kosovës si partnere e besueshme ndërkombëtarisht”.
Tutje thuhet se këto veprime të Qeverisë së Kosovës “do të ndikojnë në cilësinë dhe natyrën e bashkëpunimit me Ministrinë e Punëve të Brendshme dhe elementet vartëse të saj”.
Sot, Qeveria e Kosovës njoftoi se janë mbyllur pesë objekte të strukturave paralele serbe në veri.