Ushtria amerikane po përgatitet për mundësinë e operacioneve të zgjatura, që mund të zgjasin disa javë, kundër Iranit, nëse presidenti i SHBA-së, Donald Trump, vendos të urdhërojë një sulm.
Kështu kanë bërë të ditur dy zyrtarë amerikanë për Reuters, duke folur në kushte anonimiteti për shkak të ndjeshmërisë së planifikimeve.
Sipas tyre, një ndërhyrje e tillë do të ishte shumë më serioze sesa përplasjet e mëparshme mes dy vendeve dhe do të rriste ndjeshëm tensionet në kohën kur po zhvillohen përpjekje diplomatike mes Uashingtonit dhe Teheranit.
Të martën, të dërguarit amerikanë Steve Witkoff dhe Jared Kushner pritet të zhvillojnë bisedime me përfaqësues iranianë në Gjenevë, me Omanin në rolin e ndërmjetësit. Sekretari amerikan i Shtetit, Marco Rubio, ka paralajmëruar se arritja e një marrëveshjeje me Iranin është “shumë e vështirë”, edhe pse Trump preferon një zgjidhje diplomatike.
Ndërkohë, SHBA-ja ka shtuar praninë ushtarake në Lindjen e Mesme. Pentagoni ka dërguar një aeroplanmbajtëse shtesë në rajon, mijëra trupa, avionë luftarakë dhe anije me raketa të drejtuara, duke rritur kapacitetet për sulme dhe mbrojtje.
Trump, duke folur pas një aktiviteti ushtarak në Karolinën e Veriut, ka lënë të hapur mundësinë e ndryshimit të regjimit në Iran, duke thënë se “kjo do të ishte ndoshta gjëja më e mirë që mund të ndodhte”. Ai nuk specifikoi se kë do të preferonte në krye të Iranit.
Sipas zyrtarëve amerikanë, ndryshe nga operacioni i vitit të kaluar kundër objekteve bërthamore iraniane – i njohur si “Midnight Hammer” – i cili ishte një sulm i vetëm me bombardues strategjikë, këtë herë po shqyrtohet një plan shumë më kompleks dhe i zgjatur.
Në rast të një fushate të vazhdueshme, SHBA-ja mund të godasë jo vetëm infrastrukturën bërthamore, por edhe objektet shtetërore dhe të sigurisë të Iranit. Zyrtarët theksojnë se Uashingtoni pret kundërpërgjigje nga Teherani, çka mund të çojë në sulme dhe kundërsulme të ndërsjella për një periudhë të gjatë.
Ekspertët paralajmërojnë se rreziku për forcat amerikane do të ishte shumë më i madh, pasi Irani posedon një arsenal të fuqishëm raketash dhe mund të godasë baza amerikane në rajon.
SHBA-ja ka baza ushtarake në disa vende të Lindjes së Mesme, përfshirë Jordaninë, Kuvajtin, Arabinë Saudite, Katarin, Bahreinin, Emiratet e Bashkuara Arabe dhe Turqinë.
Nga ana tjetër, Garda Revolucionare e Iranit ka paralajmëruar se në rast sulmi ndaj territorit iranian, do të godasë çdo bazë amerikane në rajon, raporton Reuters.
Trump ka kërcënuar vazhdimisht me bombardime ndaj Iranit për shkak të programit bërthamor dhe raketor, si dhe për shtypjen e kundërshtarëve të brendshëm. Ai ka paralajmëruar se alternativa ndaj diplomacisë do të ishte “shumë traumatike”.
Ndërkohë, Irani ka deklaruar se është i gatshëm të diskutojë kufizime në programin e tij bërthamor në këmbim të heqjes së sanksioneve, por ka përjashtuar lidhjen e kësaj çështjeje me programin raketor.
Në të njëjtën kohë, figura opozitare iraniane Reza Pahlavi ka deklaruar se një ndërhyrje ushtarake amerikane mund të “shpëtojë jetë” dhe ka bërë thirrje që SHBA-ja të mos zgjasë shumë negociatat me udhëheqjen fetare të Iranit.