Shtetet e Bashkuara dhe Venezuela janë pajtuar të rivendosin marrëdhëniet diplomatike dhe konsullore, njoftoi Departamenti i Shtetit të SHBA‑së në një deklaratë të enjten.
Ky hap shënon një ndryshim të madh në marrëdhëniet mes dy vendeve, pas muajve të tensioneve dhe operacionit ushtarak amerikan që çoi në kapjen e ish‑presidentit venezolanas Nicolás Maduro në janar të këtij viti, shkruan BBC, transmeton Dukagjini.
Sipas njoftimit, rifillimi i marrëdhënieve do të ndihmojë për të promovuar stabilitetin, për të mbështetur rimëkëmbjen ekonomike dhe për të shtyrë përpara pajtimin politik në Venezuelë.
Departamenti i Shtetit tha se angazhimi i tyre është i fokusuar në krijimin e kushteve për një tranzicion paqësor drejt një qeverie të zgjedhur në mënyrë demokratike.
Marrëdhëniet diplomatike ishin ndërprerë në vitin 2019, kur ata mbyllën ambasadat e tyre pas vendimit të Venezuelas për të ndërprerë kontaktet me Uashingtonin. Tani misionet diplomatike po rihapen, ndërsa vendet nisin një fazë të re bashkëpunimi.
Qeveria aktuale e Venezuelës, e udhëhequr nga presidentja në detyrë Delcy Rodríguez, ka shprehur gatishmërinë për të hapur një dialog të bazuar në respekt të ndërsjellë dhe bashkëpunim midis dy vendeve.
Autoritetet venezuelane shpresojnë që këto marrëdhënie të çojnë në një zhvillim pozitiv dhe përfitime të ndërsjellta për popullin.
Ky vendim vjen pas një periudhe ku zyrtarë të lartë amerikanë, përfshirë Sekretarin e Brendshëm Doug Burgum, vizituan Venezuelën për të forcuar dialogun dhe partneritetin në fusha të ndryshme, përfshirë energjinë dhe minierat.