Shtetet e Bashkuara dhe India kanë arritur një marrëveshje tregtare, sipas së cilës SHBA do t’i ulë tarifat doganore për mallrat indiane nga 50% në 18%, në këmbim të angazhimit të Indisë për të ndalur blerjen e naftës ruse dhe për të reduktuar barrierat tregtare ndaj produkteve amerikane.
Marrëveshja u njoftua vonë të hënën nga presidenti amerikan Donald Trump, pas një bisede telefonike me kryeministrin indian Narendra Modi.
Trump tha se India do të fillojë të blejë naftë nga SHBA-ja dhe potencialisht edhe nga Venezuela.
Një zyrtar i Shtëpisë së Bardhë i tha Reuters-it se Uashingtoni do të heqë një tarifë ndëshkuese prej 25% ndaj importeve nga India, e cila ishte vendosur për shkak të blerjeve indiane të naftës ruse dhe ishte shtuar mbi tarifën “reciproke” prej 25%.
Lajmi u prit pozitivisht në tregjet financiare. Aksionet e kompanive të mëdha indiane të listuara në SHBA u rritën ndjeshëm: Infosys u rrit me 4.3%, Wipro me 6.8%, HDFC Bank me 4.4%, ndërsa fondi i bursës iShares MSCI India u rrit me 3%, raporton Reuters.
Trump deklaroi se India është zotuar të “blejë produkte amerikane në nivele shumë më të larta”, përfshirë mbi 500 miliardë dollarë energji amerikane, përfshirë qymyrin, si dhe produkte teknologjike, bujqësore dhe të tjera. Ai shtoi se India do të ecë drejt uljes së tarifave dhe barrierave jotarifore ndaj SHBA-së, deri në zero.
Megjithatë, njoftimi i Trump-it nuk përfshiu detaje kyçe, si afati i hyrjes në fuqi të tarifave të reja, data e ndalimit të plotë të blerjeve të naftës ruse nga India apo lista konkrete e produkteve amerikane që India do të blejë.
Deri të hënën pasdite, Shtëpia e Bardhë nuk kishte publikuar një shpallje zyrtare apo njoftim në Regjistrin Federal. Ministritë indiane të Tregtisë dhe Punëve të Jashtme nuk reaguan menjëherë, ndërsa edhe ambasada ruse në Uashington nuk dha koment.
India është importuesja e tretë më e madhe e naftës në botë dhe mbulon rreth 90% të nevojave të saj përmes importeve. Blerja e naftës ruse me çmime të ulëta ka ndihmuar Indinë të reduktojë kostot që nga pushtimi i Ukrainës nga Rusia në vitin 2022.
Megjithatë, sipas Reuters-it, India ka filluar së fundmi të ngadalësojë blerjet nga Rusia. Importet pritet të bien nga rreth 1.2 milion fuçi në ditë në janar, në rreth 800 mijë fuçi në ditë deri në mars.
Ekspertët vlerësojnë se marrëveshja e re e sjell Indinë në një linjë më të afërt me partnerët e saj aziatikë për sa i përket tarifave dhe pritet të lehtësojë presionin mbi eksportet indiane dhe monedhën e vendit.