Shefja e UNMIK-ut, Caroline Ziadeh, ka mirëpritur masat që çojnë në uljen e tensioneve në veri të Kosovës, përfshirë vendimin për heqjen e barrikadave.
Ajo ka bërë thirrje që palët të kthehen në tavolinë të dialogut e të arrihet një marrëveshje normalizimi.
Po ashtu, përmes një komunikate për media nga UNMIK-u, thuhet se Ziadeh ka theksuar rëndësinë e mbajtjes së zotimeve.
“Shefja e UNMIK-ut, Caroline Ziadeh, mirëpret të gjitha masat për t’i ulur tensionet në veri të Kosovës, përfshirë heqjen e barrikadave. Ajo pranon përpjekjet e mundimshme të të gjitha palëve, përfshirë partnerët ndërkombëtarë, për të garantuar sigurinë e qytetarëve të të gjitha komuniteteve në Kosovë. Ziadeh thekson rëndësinë e mbajtjes së zotimeve dhe të rifillojnë pa vonesë bisedimet për adresimin e plotë të çështjeve të pazgjidhura dhe normalizimin e marrëdhënieve”, thuhet në komunikatën e UNMIK-ut.
“Ajo shpreh vlerësimin e saj për vendosmërinë e palëkundur të partnerëve ndërkombëtarë për ta nxitur dialogun në ndjekje të sigurisë dhe stabilitetit, në respektim të plotë të mandatit të tyre”, vijon komunikata.
Ndryshe, presidenti i Serbisë, Aleksandar Vuçiq, pas takimit me përfaqësuesit e serbëve nga Kosova, kishte deklaruar se heqja e barrikadave në veri të Kosovës do të nisë mëngjesin e së enjtes.
“Për 24 orë apo 48 orë do të hiqen barrikadat”, kishte thënë ai.
Vuçiq, mbrëmjen e 28 dhjetorit në kazermën e Ushtrisë Serbe në Rashkë, afër kufirit me Kosovën, zhvilloi bisedimet me përfaqësuesit e serbëve nga Kosova për heqjen e barrikadave.
Ndryshe, arrestimi i ish-policit serb, në të cilin Kosova dyshon se ka sulmuar anëtarët e Komisionit Qendror të Zgjedhjeve, ka qenë arsyeja e barrikadave që përfaqësuesit serbë në veri të Kosovës po mbajnë që nga 10 dhjetori.
Lirimi i tij është një nga kushtet për heqjen e bllokadave dhe më 28 dhjetor autoritetet në Kosovë ndryshuan masën e sigurisë, nga paraburgimi në arrest shtëpiak.