Ministrja e Mjedisit, Planifikimit Hapësinor dhe Infrastrukturës, Fitore Pacolli, ka reaguar pas shembjes së rrugës “Don Shtjefën Kurti” në Prishtinë, duke e cilësuar atë si pasojë të drejtpërdrejtë të neglizhimit të standardeve të ndërtimit.
Pacolli ka thënë se respektimi i ligjit dhe kritereve teknike është jetik për mbrojtjen e jetës së qytetarëve, punëtorëve dhe stabilitetit të infrastrukturës, duke theksuar se llogaridhënia duhet të jetë e plotë dhe e panegociueshme.
“Kjo që shohim në Prishtinë është pasojë e drejtpërdrejtë e neglizhimit të standardeve. Respektimi i ligjit dhe i kritereve teknike është jetik për mbrojtjen e jetës së qytetarëve, punëtorëve dhe stabilitetin e infrastrukturës sonë, andaj llogaridhënia duhet të jetë e plotë dhe e panegociueshme”, ka shkruar ajo në Facebook.
Ajo ka shtuar se, pavarësisht rezistencës nga grupet e interesit apo politika pa llogaridhënie, Ministria po punon për vendosjen e rendit dhe rregullit në këtë fushë.
Sipas saj, edhe komunat duhet të mbajnë përgjegjësi për mungesën e inspektimit dhe mosrespektimin e standardeve në ndërtim.