Deputetja e Partisë Demokratike të Kosovës (PDK), Ariana Musliu-Shoshi, ka kërkuar dorëheqjen e Qeverisë Kurti pas vendimit të Gjykatës Kushtetuese që shpalli të pavlefshëm Ligjin për Byronë Shtetërore për Verifikimin dhe Konfiskimin e Pasurisë së Pajustifikueshme.
Ky ligj, i cili konsiderohej një nga shtyllat kryesore të reformës në drejtësi, u rrëzua nga Gjykata Kushtetuese me pesë vota për dhe katër kundër.
Musliu-Shoshi kritikoi qeverinë aktuale për dështimet e saj të vazhdueshme në respektimin e Kushtetutës..
“Ligji i dytë kryesor i reformës në drejtësi i dështoj kësaj qeverie e cila thirret në drejtësi por është SHKELËSE serike e Kushtetueses! Nuk i ka mbet gjë tjetër përveç dorëheqjes. Shko Albin!”, shkroi Musliu-Shoshi.
Edhe ministrja e Drejtësisë së Kosovës, Albulena Haxhiu, ka reaguar ndaj vendimit të Kushtetueses për rrëzimin e Ligjit për Byronë Shtetërore për Verifikimin dhe Konfiskimin e Pasurisë së Pajustifikueshme.
Haxhiu ka thënë se Gjykatës i deshën 16 muaj për të vlerësuar përputhshmërinë e këtij ligji dhe se vendimi u mor me një shumicë të ngushtë prej pesë nga nëntë gjyqtarë.
Ajo ka theksuar se rrëzimi i tij përbën një pengesë të madhe për reformat e drejtësisë në vend.
“Situata për ne është shumë e qartë, vullneti i qytetarëve për drejtësi po tentohet të përmbyset nga një grusht njerëzish që ende u shërbejnë dhe i kanë borxhe nomenklaturës së vjetër, por beteja jonë për reformë dhe shtet të së drejtës nuk do të ndalet. Byroja do të bëhet. Pasuria publike e shpërdoruar e përvetësuar do të konfiskohet. Vullneti popullor do të jetësohet”, ka shkruar tutje ajo.