Në Qendrën e Studentëve në Prishtinë, në konviktin numër tre ka ndodhur një shpërthim i zjarrit në katin përdhesë të këtij objekti, rreth mesditës të së enjtes së 16 qershorit.
Drejtori i Qendrës së Studentëve, Fatmir Sfishta në një prononcim për Portalin D, ka konfirmuar shpërthimin, por ka thënë se është intervenuar shumë shpejt dhe se nuk ka asgjë për t’u shqetësuar.
“Po, ka ndodhur një shpërthim i vogël zjarri në katin përdhesë të konviktit, por është intervenuar dhe tani ekspertët janë duke bërë ekspertizën për të evidentuar se cili ishte shkaku i këtij incidenti”, ka thënë Sfishta.
Sipas burimeve të Portalit D, zjarrfikësit kanë intervenuar në kohë dhe gjendja në konviktin numër tre është stabile, nuk raportohet për të lënduar, por vetëm për dëme të vogla materiale.
