10 vatra zjarri janë shuar në të gjithë territorin e Shqipërisë gjatë 24 orëve të fundit nga efektivë të Forcave të Armatosura, si dhe nën koordinimin e Agjencisë së Mbrojtjes Civile, ka njoftuar ministri i Mbrojtjes, Niko Peleshi.
Sipas tij, për shuarjen e tyre janë angazhuar 100 efektivë të Forcave të Armatosura, 4 mjete dhe helikopteri Cougar.
Është nën kontroll vatra, në fshatin Rrilë, njësia administrative Shënkoll në bashkinë Lezhë, në vendgrumbullimin e mbetjeve urbane. Zjarri është shuar dhe situata po monitorohet, pasi mbeturinat mund të vazhdojnë të digjen në brendësi pa u shfaqur në sipërfaqe.
Siç raporton TopChannel, është riaktivizuar zjarri në vendin e quajtur “Vija mbi Okol”, në fshatin Theth, të bashkisë Shkodër, ku janë njoftuar strukturat e Emergjencave Civile në qark. Situata po monitorohet nga shërbimet e policisë së Thethit.
Në fshatin Bushat, në Vaun e Dejës, zjarri në një sipërfaqe me mbeturina është shuar plotësisht dhe zjarrvënësi është shoqëruar nga efektivët e Policisë së Shtetit.