Kandidati i PDK-së për kryetar të Lipjanit, Shukri Buja, ka publikuar një videomesazh në Facebook ku ka shpalosur një pjesë të vizionit të tij për arsimin dhe shëndetin e fëmijëve në këtë komunë.
Ai ka thënë se edukimi i fëmijëve nuk përfundon vetëm në bankat e shkollës, prandaj në planin e tij parashihet që çdo nxënës në Lipjan të mësojë edhe notin.
Për këtë arsye, Buja premtoi ndërtimin e pishinave shkollore moderne, jo vetëm në qytet, por edhe në fshatra si Shalë, Magurë, Janjevë, Dobrajë e Madhe, Gadime dhe Sllovi.
Sipas tij, këto pishina do të jenë të standardizuara dhe të qasshme për të gjithë nxënësit, përmes transportit të organizuar nga komuna.
“Ky nuk është vetëm një investim në infrastrukturë, por një investim në shëndetin, sigurinë dhe të ardhmen e fëmijëve tanë. Së bashku po ndërtojmë një Lipjan më të shëndetshëm, më aktiv dhe më të drejtë për të gjithë”, ka thënë Buja.
