Qeveria në mbledhjen e 96-të të saj ka miratuar një mori projektligjesh. Ndër to është Projektligji për Sigurinë Kibernetike, ai për Prokurin e Shtetit dhe Prokurorinë Speciale. Gjithashtu u miratua edhe projektligji i cili i hap rrugë themelimit të Institutit për Krime Lufte.
Një muaj para se t’ua kërkojë raportet për punët e tyre, Kryeministri i Kosovës, Albin Kurti mblodhi ministrat e kabitetit të tij.
Të gjithë njëzëri miratua një sërë projektligjesh.
Ndër më të rëndësishmit vlerësohet ai për Prokurorin e Shtetit në të cilin janë bërë disa ndryshime.
“Është bërë fuqizimi i kritereve për Kryeprokuror të Shtetit dhe Kryeprokuror të Prokurorive. Poashtu janë qartësuar kompetencat e Kryeprokurorit të Shtetit mbi Prokuroritë”, ka thënë Albulena Haxhiu, Ministre e Drejtësisë.
Ministrja Haxhiu e vlerësoi avancim të legjislacionit për sistemin prokurorial edhe miratimin e Projektligjit për Prokurorinë Speciale.
Ky projektligj parasheh krijimin e një njësie të veçante të Policisë e cila do t’i dalë në ndihmë për ndjekjen e veprave të korrupsionit.
Dritën e gjelbër të Qeverisë e mori edhe Projektligji i cili i hap rrugë krijimt të Agjencisë për Siguri Kibernetike. Ndërsa u miratua edhe projektligji i cili mundëson themelimin e Institutit për Krimet e kryera gjatë Luftës në Kosovë, i cili ishte shuar në vitin 2018.
Kurse gjendja e rëndë në sistemin shëndetësor ka shtyrë Qeverinë të themelojë me një Komision Ekzekutiv për këtë sektor.
Komisioni i cili do të kryesohet nga Kurti, sipas tij, ka përgjegjësi reformimin e SHSKUK-së përmes fuqizimit të QKUK-së dhe spitaleve rajonale, si dhe themelimin e Spitalit të Prishtinës, ndër të tjera.