Ministrja e Arsimit dhe Sportit në Shqipëri, Evis Kushi, ka bërë të ditur se për shkak të situatës së rënduar të reshjeve në disa zona të vendit, mësimi është ndërprerë në 56 shkolla.
Kushi ka thënë se këtë vendim e ka marrë për sigurinë e nxënësve deri në përmirësimin e situatës.
“Ndërkohë, të gjitha strukturat tona janë vazhdimisht në terren dhe bashkitë janë angazhuar për t’i marrë masat dhe vlerësuar situatën hap pas hapi. Mësimi për orët e humbura do të zëvendësohet në vijim sipas një kalendari të përcaktuar nga DPAP”, ka shkruar Kushi në Facebook.
Ndryshe, si pasojë e reshjeve të dendura të shiut, është rapotuar për përmbytje në disa qytete të Shqipërisë.
Siç raporton Top-Channel, lumi Vjosë gjatë mbrëmjes të së mërkurës, ka dalë nga shtrati.
Aktualisht, pa energji elektrike janë fshatrat Orikum, Dukat, Llogora, Radhime, Kallarat, Bolene, Vranisht, Mesaplik, Terbac, Brataj, Velcë, Bashaj, Sevaster, Gorisht, Dushkarak dhe Mazhar.