Sindikata e Policisë së Kosovës, i janë gëzuar lirimit të tre policëve të Kosovës të cilët ishin kidnapuar nga forcat serbe, më 14 qershor.
Në një reagim në Facebook, thuhet se Sindikata e Policisë së Kosovës, “ka përcjellur me vëmendje situatën e tre zyrtarëve policorë që nga rrëmbimi, prandaj mirëpret lirimin e tyre dhe kthimin në familje”.
“Zyrtarëve policorë ju dëshirojmë shëndet dhe kthim sa më të shpejtë në detyrat e rregullta zyrtare, me dëshirën që një rast i tillë të mos ju ndodhë asnjëherë tjetër”, thuhet në reagimin e sindikatës.
Në Serbi tre policët – Beqir Sefa, Mustafë Shemi dhe Rifat Zeka – u ngarkuan me veprën penale: prodhim, posedim, mbajtje dhe trafikim i paligjshëm i armëve dhe lëndëve plasëse, e cila bart dënim me burg deri në 12 vjet.
Atyre iu shqiptua masa e paraburgimit më 16 qershor, por nuk ishte e qartë kohëzgjatja e saj.
Arrestimi i tre policëve nxiti reagime të shumta si në Kosovë, ashtu edhe te bashkësia ndërkombëtare, e cila kërkoi vazhdimisht lirimin e tyre.