Lëvizja Vetëvendosja e ka humbur betejën me të cilën synonte që votuesve në diasporë të ua mundësojë që të votojnë edhe në vendvotime alternative, përpos konsullatave dhe ambasadave.
Ankesës së Lidhjes Demokratike të Kosovës i ka dhënë të drejtë Paneli Zgjedhor për Ankesa dhe Parashtresa.
Në arsyetimin e saj, PZAP thotë se Ligji për zgjedhjet e përgjithshme dhe rregullat zgjedhore nuk e lejojnë votimin përpos nëpër hapësirat e përfaqësive diplomatike të Republikës së Kosovës.
Por, ky vendim ka nxitur shumë reagime, veçanërisht ndërmjet LDK-së e VV-së.
Lideri i Lidhjes Demokratike i është kundërpërgjigjur kritikave të VV-së, duke thënë se ky ishte një tentim i radhës për t’i krijuar kushtet për vjedhje të votës.
“… E vërteta është e thjeshtë. Mërgata kurrë më të lehtë nuk e ka patur votimin. Përveç se zgjedhjet janë në fundvit, kur secili mund të jetë në atdhe; secili bashkëatdhetar që nuk vie këndej, mund të votojë në konsullatë e ambasadë të Republikës; shtetit tonë. Mund dhe të votojnë edhe me postë; secili në emrin e vet, me fletëvotim jo të printuar por të pranuar nga shteti i vet…”- Lumir Abdixhiku – Kryetar i LDK-së
Edhe për Partinë Demokratike të Kosovës tentimi për të votuar jashtë përfaqësive diplomatike ka qenë e papranueshme. Anëtari i kësaj partie në KQZ, Arianit Elshani thotë se refuzimi i këtij propozimi nuk është tendencë që të iu pamundësohet votimit atyre që votojnë në diasporë, por është e kundërligjshme.
“Po nuk qëndron ajo, ky ligj është miratuar gjatë kohës sa LVV ka qenë në Qeveri pra ligji e përcakton qartë dhe këtë e ka konifrmu edhe PZAP e në qoftë se vazhdohet tutje unë besoj që njejt vepron edhe Gjykata Supreme se nuk ka interpretim tjetër në raport me këtë çështje”, ka thënë – Arianit Elshani – Përfaqësues i PDK-së në KQZ.
Televizioni ka pyetur Vetëvendosjen nëse do të ankohen në Gjykatë Supreme ndaj këtij vendimi, por ata nuk janë përgjigjur.
Megjithëkëtë, në një bisedë telefonike me anëtarin e tyre në KQZ, Sami Kurteshi, ai tha se nuk e di se si vendos partia, por ai personalisht konsideron se duhet të ankohet ndaj vendimit të PZAP-së.
Sipas këshillës juridike në vendimin e PZAP-së, ankesa mund të bëhet bazuar në nenin 118 të Ligjit për Zgjedhje të Përgjithshme, pika 4, sipas të cilit kjo mund të bëhet nga ‘nga pala e interesuar’.