Skuadra e Shqipërisë në operacionin e kërkim-shpëtimit në zonat e prekura nga tërmeti, tashmë ka arritur në Turqi.
Kështu ka bërë të ditur kryeministri i Shqipërisë, Edi Rama, përmes një postimi në Facebook, ku ka shpërndarë një fotografi pak minuta përpara zbritjes së skuadrës në terren.
“Mbërriti në Turqi skuadra e kërkim-shpëtimit dhe e ndihmës shëndetësore e dërguar nga shteti shqiptar”, shkroi Rama.
Ndryshe, edhe kontingjenti i parë i FSK-së në operacionin e kërkim-shpëtimit në zonat e prekura nga tërmeti në Turqi, tashmë ka arritur në Adana.
Fondacioni SETA në Washington ka publikuar pamje nga momenti kur ekipi i Kosovës ka arritur në Adana dhe është pritur me duartrokitje nga vullnetarët turq.
“Ekipi i Kosovës i nisur për në Adana merr duartrokitje nga vullnetarët turq që presin fluturimet e tyre në rajon”, thuhet në njoftimin e SETA-s.
Njoftimin për nisjen e këtij kontigjenti drejt Turqisë e kishte bërë ministri i Mbrojtjes, Armend Mehaj.
“Pas konsultave me Gjeneral Jasharin, kontakteve direkte gjatë tërë ditës me homologun tim turk, ministrin e Mbrojtjes, Hulusi Akar, vendimin e kryeministrit Kurti dhe autorizimit nga ana e presidentes Osmani, nisëm kontingjentin e specializuar të FSK-së për operacionin humanitar në Turqi për reagim me rastin e tërmetit të sotëm”, kishte shkruar ministri i Mbrojtjes, Armend Mehaj.
Ministri Mehaj ka shtuar se taskforca e FSK-së përbëhet nga specialistët në kërkim- shpëtim urban, mjekësi emergjente dhe njësitë e K9.
Ekipet e shpëtimit kanë vazhduar punimet edhe të martën për të gjetur të mbijetuar në rrënojat e mijëra ndërtesave të rrëzuara nga një tërmet me magnitudë 7.8 dhe pasgoditje të shumta që goditën Turqinë lindore dhe Sirinë fqinje, me zbulimin e më shumë trupave duke e çuar numrin e të vdekurve në më shumë se 5 mijë.
Vendet në të gjithë botën kanë dërguar ekipe për të ndihmuar në përpjekjet e shpëtimit dhe agjencia e menaxhimit të fatkeqësive të Turqisë ka thënë se më shumë se 24 mijë e 400 personel emergjence janë tani në terren.
Por me një zonë kaq të gjerë territori të goditur nga tërmeti i së hënës dhe gati 6 mijë ndërtesa të konfirmuara se janë shembur vetëm në Turqi, përpjekjet e tyre u shpërndanë paksa.
Përpjekjet për të arritur të mbijetuarit janë penguar dhe nga temperaturat nën zero dhe afër 200 lëkundjet e pasme, të cilat e bënë të rrezikshëm kërkimin nëpër struktura të paqëndrueshme.