Sonte përfundon faza e ligës në UEFA Champions League, me 18 ndeshje që zhvillohen njëkohësisht nga ora 21:00, ku do të përcaktohet fati përfundimtar i skuadrave në garë.
Gara më e madhe është për vendet 1–8, të cilat sigurojnë kualifikim direkt në fazën e 1/16-ës. Ekipet që renditen nga vendi i 9-të deri në të 24-in do të luajnë në play-off, ndërsa skuadrat nga 25–36 eliminohen nga gara.
Bayern Munich është në pozitë komode, i dyti në tabelë dhe tashmë i kualifikuar. Bavarezët shpresojnë vetëm në ndonjë gabim të Arsenalit, për të marrë vendin e parë.
Real Madrid renditet i treti dhe është shumë pranë një vendi në top tetëshe, pavarësisht një sezoni me luhatje. Ndërkohë, Barcelona dhe Atletico Madrid, që janë me pikë të barabarta, shpresojnë të futen në top 8, me diferencën e golave që aktualisht i penalizon katalanasit.
Borussia Dortmund ndodhet në vendin e 16-të dhe pritet realisht të luajë në play-off, ndërsa Bayer Leverkusen (vendi 20) rrezikon të dalë nga zonat kualifikuese nëse nuk merr rezultat pozitiv.
Sezoni zhgënjyes për Eintracht Frankfurt tashmë ka marrë fund, pasi skuadra gjermane është eliminuar pa pasur shanse për kualifikim.
Në anën tjetër, surpriza e madhe e këtij edicioni është Qarabag FK, që me fitore ndaj Eintracht Frankfurt, Copenhagen dhe Benfica, si dhe barazim 2-2 me Chelsean, ka siguruar një vend në zonën e play-off-it.
Arsenali, me rekord perfekt në këtë edicion, pret Kairatin, skuadrën e fundit në tabelë, dhe pritet të mbyllë fazën e ligës me fitore. Ata tashmë e kanë siguruar vendin në top dy, por synojnë ta ruajnë kreun.
Nga Premier League, Manchester City, Liverpool, Chelsea, Newcastle dhe Tottenham janë ende në garë për top tetëshen dhe kanë nevojë për fitore për të qenë të qetë.
Lista e plotë i ndeshjeve (ora 21:00):
- Eintracht Frankfurt – Tottenham
- Atletico Madrid – Bodo/Glimt
- Bayer Leverkusen – Villarreal
- Arsenal – Kairat
- Pafos – Slavia Prague
- Manchester City – Galatasaray
- Club Brugge – Marseille
- Benfica – Real Madrid
- Union Saint-Gilloise – Atalanta
- PSV – Bayern Munich
- Athletic Club – Sporting CP
- Liverpool – Qarabag
- Barcelona – Copenhagen
- Monaco – Juventus
- Ajax – Olympiacos
- PSG – Newcastle United
- Borussia Dortmund – Inter
- Napoli – Chelsea
Sonte është mundësia e fundit për skuadrat që të sigurojnë kualifikimin dhe të vazhdojnë garën për trofeun më prestigjioz të futbollit evropian për klube.