Çmimi i naftës në Kosovë ka shënuar një rritje krahasuar me çmimin e publikuar dje nga Ministria e Industrisë, Ndërmarrësisë, Tregtisë dhe Inovacionit, ndërsa çmimi i benzinës ka mbetur i pandryshuar.
Në njoftimin e sotëm të MINTI-it, çmimet maksimale janë 1.89 euro për litër të naftës, ndërkaq 1.46 euro për litër të benzinës teksa çmimi i gazit është 0.77 euro për litër.
Ndërkaq, të martën çmimi i naftës ishte 1.88 euro për litër, 1.46 për benzinë dhe 0.74 euro për gas.
Ndërkohë, pas arritjes së armëpushimit dyjavor mes Shteteve të Bashkuara dhe Iranit, çmimet e naftës në tregun botëror kanë rënë ndjeshëm, duke humbur mbi 13.5% dhe duke u ulur në 94 dollarë për fuçi për naftën bruto Brent, që përdoret si pikë referimi.
Kujtojmë se rritja globale e çmimit të naftës kishte filluar më 28 shkurt, kur Shtetet e Bashkuara dhe Izraeli nisën operacione ushtarake në Iran.
Ngushtica e Hormuzit, që përdoret për transportin e 20% të naftës botërore, u mbyll nga Irani, duke ndikuar në çmimet globale.