Ministri i Punëve të Brendshme, Xhelal Sveçla, ka thënë për Radio Kosovën se është i kënaqur me aplikimet. Ndërsa, ekspertë të sigurisë thonë se konkursi mund të dështojë për shkak të numrit të vogël të aplikimeve, që është pasojë e presionit të Serbisë.
Konkursi i hapur në fillim të janarit për rekrutimin e policëve të rinj nga radhët e komuniteteve, që do të angazhohen në katër komunat në veri të vendit, pas dorëheqjeve të ish policëve serbë, pritet të mbyllet sot.
Duke mos treguar numrin e aplikantëve, ministri i Punëve të Brendshme, Xhelal Sveçla, ka thënë se është i kënaqur me aplikimet.
“Mund të them lirisht se jam i kënaqur me përgjigjen që kemi marrë. Ky konkurs do të jetë në vazhdimësi i hapur derisa nuk plotësohen të gjitha vendet. Por, tani për tani jam shumë i kënaqur me përgjigjen që kemi marrë për sa i përket aplikimeve”, tha Sveçla.
Marrë parasysh zhvillimet në veri, numri i aplikuesve mund të jetë i vogël, vlerësojnë ekspertë të sigurisë.
Njëri nga ta, Fadil Kajtazi, thotë se ky konkurs mund të dështojë, si pasojë e presionit të madh të institucioneve të Serbisë te pjesëtarët e komunitetit serb në Kosovë.
“Gjasat për të konkurruar pjesëtarë të nacionalitetit serb në këtë konkurs për policë të Kosovës, janë tepër të vogla. Jo për shkak se qytetarët e pjesës veriore nuk kanë dëshirë, por për shkak se ekziston një frikë e ngjashme, si për shembull, ata qytetarë serbë që regjistronin veturat me targa RKS u digjeshin veturat apo përjetonin presione të ndryshme”, tha ai.
Teksa flet për presionin nga Serbia, në drejtim të serbëve lokalë, eksperti i sigurisë, Nuredin Ibishi, shprehet skeptik për sa i përket përmbylljes me sukses të konkursit për policë të rinj.
“Unë vazhdoj të mendoj në atë se ndoshta do të ishte një zgjidhje më e mirë politike, mundësia e rikthimit të zyrtarëve policorë, përveç atyre që nuk janë të involvuar në kryerjen e veprave penale si dhe disa eprorëve aty që kanë qenë iniciatorë për bashkëpunim të vazhdueshëm me regjimin në Beograd. Pra, mendoj se me një zgjidhje politike, rikthimi do të ishte i mundshëm”, tha Ibishi.
Konkursi që fillimisht ishte paraparë të mbyllej më 27 janar, pritet të mbyllet sot. Nga Policia, nuk kanë treguar numrin e aplikantëve.
“Siç jeni të informuar konkursi është i hapur, ndërsa për sa i përket procesit të mëtejmë do të informoheni me kohë”, kanë thënë nga policia të pyetur nga Radio Kosova për numrin e aplikantëve, dhe nëse mund të zgjatet sërish afati për aplikim, në rast se numri i aplikimeve është i ulët.