Ministrja për Evropën dhe Punët e Jashtme, Elisa Spiropali, ka mbërritur për një vizitë zyrtare në Hagë, ku do të zhvillojë një sërë takimesh me përfaqësues të lartë të qeverisë dhe institucioneve akademike holandeze.
Gjatë vizitës, Spiropali do të pritet nga Ministri i Jashtëm i Holandës, David van Weel, me të cilin do të nënshkruajë një deklaratë të përbashkët për fuqizimin e partneritetit dypalësh, në kontekstin e mbështetjes së vazhdueshme për procesin e integrimit evropian të Shqipërisë.
Në takim, Ministrja do të shprehë mirënjohjen ndaj qeverisë holandeze për rekomandimin pozitiv që i është dërguar parlamentit të Holandës, në lidhje me çeljen e grupkapitullit 5 të negociatave të anëtarësimit brenda muajit nëntor.
Gjatë ditës, Spiropali do të zhvillojë edhe një vizitë në institucionin e Paraburgimit të Gjykatës Speciale, ku do të takohet me ish-presidentin e Kosovës, Hashim Thaçi.
Në vijim, Ministrja do të mbajë një leksion të hapur në Universitetin e Shkencave të Aplikuara të Hagës, ku do të diskutojë me studentë dhe akademikë të Programit të Studimeve Evropiane mbi angazhimet e Shqipërisë në përmbushjen e standardeve evropiane.
Vizita e saj në Hagë do të përmbyllet në Ambasadën e Shqipërisë, ku Spiropali do të takohet me rrjetin e profesionistëve të rinj shqiptarë që jetojnë në Holandë, duke theksuar rolin e tyre si urë bashkëpunimi mes dy vendeve.