Të mërkurën e shtatë shtatorit, kryeministri i Shqipërisë, Edi Rama, ka njoftuar se ka ndërprerë marrëdhëniet diplomatike me Iranin, për shkak të sulmit kibernetik ndaj institucioneve qeveritare.
Rama ka njoftuar se vendimi i është bërë i ditur Ambasadës së Republikës Islamike të Iranit në Tiranë. Sipas njoftimit të shtetit shqiptar, personelit diplomatik dhe tekniko-administrativ i është kërkuar largimi brenda 24 orëve nga territori i Republikës së Shqipërisë.
Sekretari i Përgjithshëm i NATO-s, Jens Stoltenberg, ka dënuar sulmin kibernetik të Iranit ndaj institucioneve shqiptare.
Njëherësh, Stoltenberg ka thënë se NATO dhe ekspertët e Aleatëve ofrojnë mbështetje, dhe se Aleanca Veriatlantike është e përkushtuar të vazhdojë të rrisë rojet e tyre për të penguar dhe mbrojtur vendet kundër kërcënimeve kibernetike.
“Dënoj fuqishëm sulmin e fundit kibernetik ndaj Shqipërisë, të cilin Tirana dhe aleatët e tjerë ia atribuojnë Iranit. NATO dhe ekspertët e Aleatëve po ofrojnë mbështetje. NATO është e përkushtuar të vazhdojë të rrisë rojet tona: për të penguar, mbrojtur kundër kërcënimeve kibernetike”, shkroi Stoltenberg në Twitter.