Ministrja e Jashtme e Suedisë, Ann Linde, ka nënshkruar të martën e 17 majit aplikimin për anëtarësim në Aleancën Veriatlantike (NATO).
Kjo lëvizje vjen në kohën kur Rusia po vazhdon luftën e saj në Ukrainë.
E njëjta, shënon hapin formal nga Stokholmi drejt bashkimit me aleancën ushtarake, duke u dhënë kështu fund dekadave të neutralitetit ushtarak të shtetit, raporton CNN.
“Kjo është diçka e madhe, diçka serioze, dhe duket sikur kemi arritur në përfundimin më të mirë për Suedinë. Nuk e dimë se sa do të marrë aplikimi ynë, mirëpo ne e kemi llogaritur se kjo mund të marrë deri në një vit. Këtë javë aplikimi ynë do të dorëzohet, bashkë me atë të Finlandës dhe pastaj do të procedohet në NATO”, ka thënë Linde pas nënshkrimit të aplikimit.
Kryeministrja e Suedisë, Magdalena Andersson, të hënën ka thënë se vendi duhet t’i bashkohet NATO-s së bashku me Finlandën fqinje “për të garantuar sigurinë e popullit suedez”.
Ndërkaq, Suedia dhe Finlanda kanë rënë dakord që të paraqesin aplikime të njëkohshme për anëtarësim në Aleancën e Atlantikut të Veriut (NATO), të udhëhequr nga Shtetet e Bashkuara të Amerikës.
Të dy vendet janë zyrtarisht të paangazhuara ushtarakisht, por u bënë partnerë të NATO-s, duke marrë pjesë në stërvitje dhe duke shkëmbyer informacione, pasi braktisën qëndrimin e tyre të mëparshëm të neutralitetit të rreptë, kur u bashkuan me BE-në në vitin 1995 pas përfundimit të ‘Luftës së Ftohtë’.
Të dy shtetet kanë qenë të paangazhuara që nga Lufta e Dytë Botërore, pavarësisht se kanë forca të vogla ushtarake, në krahasim me Rusinë.
Suedia nuk ka bërë luftë që 200 vjet dhe politika e jashtme e pasluftës është fokusuar në mbështetjen e demokracisë në nivel ndërkombëtar, dialogun shumëpalësh dhe çarmatimin bërthamor.