Një pjesëtar i Policisë së Kosovës ka pësuar lëndime trupore gjatë kryerjes së detyrës zyrtare si pasojë e një sulmi fizik.
Ai ka pranuar tretman mjekësor dhe me vendim të prokurorit rasti shkon në procedurë të rregullt.
Sipas raportit 24-orësh të Policisë së Kosovës, rasti thuhet të ketë ndodhur të martën e 28 marsit, në Prishtinë.
Ky rast në raport është cilësuar si sulm ndaj personit zyrtar.
“Lëndime trupore ka pësuar viktima mashkull kosovar, pjesëtar i PK-së, i cili derisa ka qenë në kryerje të detyrës zyrtare, gjatë legjitimit të një automjeti është sulmuar fizikisht nga i dyshuari mashkull kosovar (pasagjer). Viktima dhe i dyshuari kanë pranuar tretman mjekësor, me vendim të prokurorit , rast në procedurë të rregullt”, thuhet në raport.