Tre persona me shtetësi britanike kanë raportuar se persona të panjohur kanë shtënë me armë zjarri në drejtim të tyre.
Në raportin 24-orësh të Policisë së Kosovës thuhet se rasti ka ndodhur të mërkurën e 23 gushtit në rrugën “Rrafshi i Kosovës’, në Prishtinë.
“Tre viktimat meshkuj me shtetësi britanike, kanë raportuar se persona të panjohur, nga një veturë në lëvizje, kanë shtënë me armë zjarri në drejtim të tyre dhe si pasojë njëri prej tyre ka pësuar lëndime të lehta trupor”, thuhet në raport.
Sipas njoftimit, në vendin e ngjarjes janë gjetur tri gëzoja të pistoletës.
Lidhur me rastin është intervistuar një i dyshuari mashkull kosovar, nga i cili është konfiskuar një pistoletë.
Me vendim të prokurorit i dyshuari është liruar dhe rasti shkon në procedurë të rregullt.