Dy sulme seksuale janë raportuar gjatë 24-orëve të fundit në Kosovë.
Siç bëhet e ditur në raportin 24-orësh, rastet kanë ndodhur në Prishtinë e Fushë Kosovë dhe të dy rastet janë sulme ndaj të miturave.
Në rastin e parë në Fushë Kosovë, e mitura ka raportuar se është sulmuar seksualisht më 4 gusht dhe pas hetimeve të zhvilluara nga policia i dyshuari është identifikuar dje i cili gjendet në qendrën e paraburgimit në lidhje edhe me një rast tjetër.
“Fushë Kosovë 04.08.2024 – 17:23. Më 23.08.2024 pas hetimeve të zhvilluara është identifikuar një i dyshuar mashkull kosovar, pasi i njëjti kishte sulmuar seksualisht viktimën femër kosovare (e mitur). I dyshuari gjendet në qendrën e paraburgimit lidhur me një rasti tjetër. Rasti në hetim”, thuhet në raportin e PK-së.
Ndërkaq në Prishtinë, një e mitur ka pranuar tretman mjekësor pasi dyshohet të jetë sulmuar seksualisht nga një burrë i cili gjendet në arrati.
Rastet vazhdojnë të jenë nën hetim nga policia.
“Prishtinë 22.08.2024-11:40. Me 23.08.2024 viktima femër kosovare e mitur, ka pranuar tretman mjekësor pasi që e njëjta dyshohet se është sulmuar seksualisht nga i dyshuari mashkull kosovar i cili gjendet në arrati, rasti në procedurë hetimore”, thuhet tutje në raportin e PK-së.