Stacioni i Policisë së Kosovës për mbikëqyrje kufitare në Jasenovik është sulmuar me armë zjarri, gjatë mbrëmjes të mërkurën.
Sipas njoftimit të Policisë së Kosovës, zyrtarët policorë të cilët kanë qenë me detyrë në stacionin policor kufitar në Jasenovik, kanë informuar se të mërkurën e 2 nëntorit gjatë natës kanë dëgjuar të shtëna armësh (dy të shtëna radhazi).
Po ashtu, sipas tyre, të shtënat kanë ndodhur derisa ata ishin në realizim të detyrave të tyre në vendin e quajtur Jabuke.
Njësia relevante policore ka gjetur një predhë plumbi e cila kishte goditur rrethojën e objektit të stacionit policor për mbikëqyrje kufitare në Jasenovik.
Lidhur me rastin, Drejtoria kundër Terrorizmit po kryen hetime mbi dyshimet për kryerjen e veprave terroriste.
Policia e Kosovës me njësitet policore do të vazhdojë angazhimet e saja në realizimin e detyrave dhe autorizimeve ligjore, në ruajtjen e rendit dhe sigurisë publike, parandalimin e krimit dhe kontrabandës si dhe shërbimin ndaj vendit dhe të gjithë qytetarëve pa dallime.