Kryetari aktual i Komunës së Junikut dhe kandidati i LDK-së për një mandat tjetër në balotazh më 9 nëntor, Ruzhdi Shehu, ka reaguar pas vendimit të Gjykatës Supreme që ka refuzuar si të pabazuar ankesën e AAK-së në Junik lidhur me listën e votuesve në këtë komunë.
Shehu ka thënë se AAK-ja ka zhvilluar një fushatë propaganduese të ulët, me qëllim të arsyetimit të dështimit në rundin e parë të zgjedhjeve.
Ai thekson se “propaganda e tyre mori përgjigjen e duhur gjyqësore”, duke shtuar se AAK “nuk e dëshiron demokracinë dhe është kundër ligjshmërisë”.
“Siç dihet, ata kanë bërë ankesë sa i përket listës së votuesve në Junik. Kjo ankesë e tyre është dy herë në PZAP. Ndërsa sot edhe Gjykata Supreme si instanca më e lartë gjyqësore në shtetin e Kosovës, ka publikuar vendimin AA.nr.100/2025 përmes të cilit po ashtu e ka refuzuar si të pabazuar ankesën e subjektit AAK dega në Junik. Me fjalë të tjera, pretendimet e tyre ankimore janë refuzuar në të gjitha instancat kompetente gjyqësore. Propaganda e tyre sot morri përgjigjen e duhur gjyqësore. Ata nuk e dëshirojnë demokracinë dhe janë kundër ligjshmërisë. Prandaj kanë humbur jo vetëm zgjedhjet por edhe betejat gjyqësore”, ka shkruar Shehu në Facebook.
Shehu ka bërë thirrje për qetësi dhe besim në institucionet e drejtësisë, duke theksuar se “Juniku është i junikasve dhe askush nuk mund ta kthejë në periudhën 2009–2021, kur qyteti ishte nën kthetrat e atyre që nuk ishin as të Junikut e as të interesuar për zhvillimin e tij.”
“Megjithatë, përgjigja e junikasve do të jetë më 9 nëntor në kutiat e votimit, pa çka se shumë përgjigje tjera do të marrin edhe nga organet kompetente ligjore. Deri atëherë kërkojmë nga të gjithë qytetarët e Junikut që të ruajnë qetësinë por edhe besimin e plotë në institucionet tona të drejtësisë”, ka shkruar mes tjerash ai.