Ministri i Punëve të Brendshme, Xhelal Sveçla, ka njoftuar se të enjten e tetë shtatorit Policia e Kosovës ka filluar me patrullimin e rregullt të vijës kufitare mes Kosovës dhe Serbisë si dhe gjithë hapësirës së Liqenit të Ujmanit.
Kështu ka bërë të ditur Sveçla, përmes një postimi në llogarinë e tij në Facebook, teksa ka theksuar se tashmë kontrolli i kufirit shtetëror është më i plotë.
“Për herë të parë që nga paslufta, pas krijimit të njësitit për patrullim ujor, Policia e Kosovës sot filloi me patrullimin e rregullt të vijës kufitare mes Republikës së Kosovës dhe Serbisë, si dhe gjithë hapësirës së Liqenit të Ujmanit. Tashmë, kontrolli i kufirit shtetëror është më i plotë. Përgëzoj Policinë e Kosovës për suksesin e radhës”, ka shkruar ai.
Ndryshe, ministri i Punëve të Brendshme, Xhelal Sveçla, të dielën e shtatë gushtit ka vizituar zyrtarët policorë në pikën kufitare në Bërnjak.
Me anë të një postimi në llogarinë e tij në Facebook, ministri i këtij dikasteri ka thënë se që nga viti i kaluar deri më tani në veri të vendit kanë ndodhur 14 sulme, 10 prej të cilave kanë qenë ndaj zyrtarëve policorë.
“Sot isha për vizitë në pikën kufitare në Bërnjak dhe në stacionin policor të policisë kufitare. Me këtë rast, takova disa nga zyrtarët policorë të cilët janë ballafaquar me sulme të shumta nga strukturat ilegale serbe në mbrëmjen e 31 korrikut si dhe zyrtarë të tjerë policorë që po angazhohen në mbrojtje të kufirit tonë”, ka shkruar Sveçla.
Zyrtarët e kësaj pike kufitare të shtunën e gjashtë gushtit janë sulmuar derisa po patrullonin në liqenin e Ujmanit.
Sveçla viziton policinë në Bërnjak: Përkundër sfidave pashë vendosmëri për punë