Afrim Syla nga kompania “Elen”, në “Debat Plus” ka thënë se asnjë Qeveri e Kosovës nuk është marrë seriozisht me energjinë solare, e cila sipas tij, është tejet e rëndësishme për vendin.
Syla theksoi se investimet në projekte solare janë mundësi e mirë që vendi të zhvillohet derisa u shpreh se mund të ndalet edhe ikja e të rinjve jashtë vendit.
Ai tha se Qeveria duhet t’i shohë bizneset si partnerë dhe po ashtu bizneset Qeverinë.
“Ne kemi qenë pjesë e debateve me të gjitha qeveritë, asnjë qeveri nuk është marrë seriozisht me energjinë. Jemi pjesë e odës ekonomike të Kosovës, jemi pjesë e odës gjermane, asnjëherë nuk i kanë marrë sugjerimet tona, edhe me ZRRE kemi pas takime. Një gjë duhet me kuptu, duhet të bëjmë çmos, Qeveria udhët të shohë si partner biznesin, edhe biznesi duhet ta shohë partner Qeverinë, vetëm kështu mund të ecim përpara, kështu do ta ndalojmë ikjen e njerëzve nga vendi, është bërë e frikshme ikja nga vendi”, tha ai.
Syla u shpreh se në kompaninë “Elen”, kanë shkuar shumë investitorë potencialë, të cilët mund të investonin në energji solare deri në 100 milionë euro.
“Vetëm në zyrën tonë kanë ardhur të interesuar, nëse i kishim marrë parasysh këto mundësi, për një vit ose dy vite investimi në energji solare do të shkonte mbi 100 milionë euro. 200 milionë euro e ka multiplikimin në ekonomi, sepse ajo e rrit çdo sektor që angazhohet. Duhet të na marrë seriozisht ministria e Qeveria”, tha ai.