Shefi i Grupit Parlamentar të Aleancës për Ardhmërinë e Kosovës (AAK), Besnik Tahiri, ka krahasuar rrugën Prishtinë – Podujevë me rrugë në Kandahar.
Në një postim në Facebook, Tahiri ka thënë se situata e njëjtë gati është edhe në rrugët për Gjakovë, Mitrovicë e Gjilan, teksa e ka quajtur qeverinë aktuale të paaftë “për të bërë punë të hairit”.
“Rruga për Podujevë është bërë si rrugë për Kandahar, e rrezikshme, e dëmshme për njerëz e vetura dhe gati e patejkalueshme. Pothuajse në të njëjtën gjendje janë edhe rrugët për Gjakovë, Mitrovicë e Gjilan, pra në të katër anët e Kosovës rrugët janë të bllokuara, ndërsa lavdet nuk ndalen. Mirë është që në këta muajt që i kanë mbetur kësaj qeverie të përfundojë ndonjë rrugë dhe të dalë me diçka konkrete në këtë 4-vjeçar. Përndryshe, po shihet që ky kabinet qeveritar është i pazot me punu diçka të hairit për vendin”, ka shkruar Tahiri në Facebook.