Shefi i Grupit Parlamentar të Aleancës për Ardhmërinë e Kosovës, Besnik Tahiri, ka reaguar ndaj deklaratës së kryeministrit të Kosovës, Albin Kurti, se brenda katër viteve janë hapur mbi 87 mijë vende pune.
Tahiri ka thënë se 87 mijë është minimumi i atyre që kanë braktisur Kosovën.
“Lejë përrallat kryeministër. Stop abuzimit me shifra imagjinare”, ka thënë shefi i grupit parlamentar të AAK-së.
“Vende të reja pune, jo se jo, por ajo çfarë mund të kuptojmë nga kjo deklaratë e kryeministrit është që për katër vite, 87 mijë është minimumi i atyre që kanë braktisur Kosovën, kuptohet numri më i madh i tyre i moshës së re, fuqi e shkathtë punëmarrëse. Stop abuzimit me shifra imagjinare!”, ka thënë tutje ai.
Gjatë kësaj të shtuneje, kryeministri i Kosovës, Albin Kurti, ka folur për skemën e re të asistencës sociale, ku ka thënë se nuk është e nevojshme që të flitet për situatën me vende të punës në Kosovës, meqë sipas tij, flasin vetë statistikat.
Lexo më shumë: Kurti: Për 4 vjet krijuam mbi 87 mijë vende të reja pune, buxhetin e rritëm për 1 miliard
Kryeministri ka thënë se në katër vitet e fundit, në Kosovë janë krijuar 87 mijë vende të reja pune, apo 26 për qind më shumë sesa kanë qenë në vitin 2019.
Kurti ka thënë se kanë arritur që të sigurojnë për buxhetin e Kosovës 1 miliard euro më shumë përgjatë tri vjetëve qeverisje.