Shefi i Grupit Parlamentar i Partisë Demokratike të Kosovës(PDK), Abelard Tahiri, ka kërkuar që mjekët dhe profesorët të largohen nga listat e deklarimit të pasurisë.
Ai nuk është pajtuar me shqyrtimin e dytë të Projektligjit nr.08/L-108 për deklarimin, prejardhjen dhe kontrollin e pasurisë dhe të dhuratave.
Në seancën plenare të Kuvendit të Kosovës, Tahiri ka thënë se profesorët dhe mjekët duhet të largohen nga lista e deklarimit të pasurisë publike, ngase nuk kanë të bëjnë me menaxhimin e parasë publike.
“Profesorët janë të përfshirë në këtë projektligj për ta deklaruar pasurinë, për të cilën ne jemi kundër se nuk menaxhojnë paranë publike…e njëjta vlen edhe për mjekët”, ka thënë Tahiri.
Ndër të tjera, ai ka thënë se në rast se arrihet dakordimi i largimit të dy kategorive nga lista e deklarimit të pasurisë “atëherë mirë, nëse jo vazhdoni”.
Ndërsa Albulena Haxhiu, Ministre e Drejtësisë, ka thënë se këto janë profesione të ndjeshme, prandaj duhet të adresohet deklarimi i tyre.
“Ky është qëndrimi i Qeverisë. Kur keni probleme të tilla, duhet të bëni amendamente”, ka thënë Haxhiu drejtuar Tahirit.
Sipas Haxhiut, të kritikosh një çështje e të mos ndërmarrësh asnjë veprim është hipokrizi.
“I nderuar unë nuk mund t’ju marr seriozisht, përderisa sa keni qenë ministër në studio televizive deklaronit se është e arritur që i keni përfshirë mjekët dhe profesorët, ndërsa tash në opozitë e kundërshtoni, nuk mund të të marr seriozisht, më fal”, i është drejtuar Haxhiu-Tahirit.
Deputetja Time Kadrijaj, nga radhët e Aleancës për Ardhmërinë e Kosovës(AAK), ka thënë se përfshirja e mjekëve dhe profesorëve në listën e deklarimit të pasurisë është e padrejtë.
“I kemi lënë mjekët me një pagë të padinjitetshme sepse s’kemi as ligj të pagave”, ka thënë ajo.
Ndërsa, Kujtim Shala nga radhët e LDK-së, ka thënë se ky debat është i kotë, sepse sipas tij, të gjithë deputetët janë kundër.
Po ashtu, edhe deputeti Bekim Haxhiu, nga radhët e PDK-së, ka thënë se mjekët po detyrohen të largohen nga vendi.
Sipas tij, Qeveria po i ngarkon edhe më shumë mjekët, duke i futur në listë të deklarimit, e të merren me çështje administrative.
Haxhiu ka thënë se duhet të ketë rritje të pagave, e jo të shtohen vështirësitë për këto kategori të ndjeshme.