Riemërimi i Arben Vitisë në krye të Ministrisë së Shëndetësisë, nuk i ka pëlqyer shefit të grupit parlamentar të PDK-së, Abelard Tahiri.
Ai tha se Vitia është mbajtur mend vetëm për “strehimin pas videove me mesazhe durimi, kur pandemia rrezikonte jetën e qytetarëve”.
Sipas Tahirit, sektori i shëndetësisë nuk do të ketë përmirësime me Vitinë në krye të saj.
“Ditë të mira për shëndetësinë, siç duket nuk do të ketë edhe për një kohë. A për mafinë e shëndetësisë, me gjasë ky durim prej tre muajsh ia paska vlejtur”, ka shkruar Tahiri.
Kryeministri i Kosovës, Albin Kurti, ka marrë vendim që Arben Vitia të jetë përsëri ministër i Shëndetësisë.
Ish-ministri i Shëndetësisë, Arben Vitia, i cili e kishte lënë këtë post për të garuar për të parin e kryeqytetit, ishte duke punuar në një ordinancë private.
Vitia i kishte humbur zgjedhjet për të parin e kryeqytetit në balotazh kundër kryetarit aktual, Përparim Rama.
Ndërkohë, pas dorëheqjes së Rifat Latifit nga Ministria e Shëndetësisë, ky post kishte mbetur pa ministër për plot 79 ditë.
Ky sektor është kritikuar më së shumti nga partitë opozitare, gazetarët dhe shoqëria civile.