Shefi i Grupit Parlamentar të Partisë Demokratike të Kosovës (PDK), Abelard Tahiri, në seancën e 9 dhjetorit në Kuvendin e Kosovës, në lidhje me situatën aktuale në veri të vendit, i ka bërë thirrje Qeverisë që të mos marrë veprime sporadike, por që të hartojë një strategji për trajtimin e kësaj zone.
“Qeveria nuk duhet të ndërmarrë hapa sporadike. Duhet të ketë strategji për trajtimin e kësaj zone. Përderisa sulmohen policët, institucionet e Kosovës, nuk mund të bëjmë veprime ad-hoc, duhet të kemi strategji për t’i larguar këto banda”, ka thënë Tahiri.
Gjithashtu, Tahiri ka theksuar se Kosovës për këtë çështje i duhet koordinim me Shtetet e Bashkuara të Amerikës (ShBA) dhe se veriu asnjëherë nuk duhet të jetë temë e diskutimit në tryezën në Bruksel.
“Besoj se Kosovës më shumë se kurrë kur vjen puna e ballafaqimit me Serbinë, i duhet një koordinim i madh me ShBA-në. Nuk duhet të lejojmë që kjo pjesë e territorit të jetë në diskutim në tryezën në Bruksel. Kemi punuar shumë të gjithë së bashku që t’i instalojmë institucionet tona në atë pjesë të Kosovës, Serbia gjithmonë e ka kundërshtuar këtë”, ka vijuar tutje ai.
Ndërkaq, Artan Abrashi, nga Lëvizja Vetëvendosje (LVV), ka thënë se këto ditë është vërtetuar ajo që vazhdimisht është thënë, që në katër komunat në veri, nuk është ndarja në serbë e shqiptarë, por në banda kriminale dhe qytetarë.
“U vërtetua edhe një herë ajo që kemi thënë vazhdimisht, në katër komunat në veri nuk është ndarja në serbë e shqiptarë, por në banda kriminale dhe qytetarë. Ky dallim po theksohet çdo ditë, policia jonë po e bën atë, kurse kriminelëve kjo gjë po ju pengon”.
Ndryshe, tre ditët e fundit, Mitrovica e Veriut ka qenë në tensione pas planifikimit të Qeverisë së Kosovës për mbajtjen e zgjedhjeve në këtë pjesë.