Tarifat e reja globale të Presidentit të SHBA-së, Donald Trump, kanë hyrë në fuqi me një normë prej 10%, pasi Gjykata Supreme bllokoi shumë nga taksat e tij gjithëpërfshirëse të importit të premten.
Tarifa është vendosur përmes një urdhri ekzekutiv sipas Seksionit 122 të Ligjit për Tregtinë të vitit 1974, që lejon presidentin të vendosë taksa për 150 ditë pa miratimin e Kongresit.
Urdhri ekzekutiv thekson se kjo masë është “për të adresuar problemet themelore të pagesave ndërkombëtare dhe për të vazhduar punën e administratës për rregullimin e marrëdhënieve tregtare në dobi të punëtorëve, fermerëve dhe prodhuesve amerikanë”.
Trump ka argumentuar se tarifat janë të nevojshme për të zvogëluar deficitin tregtar të Amerikës, i cili javën e kaluar arriti nivelin rekord prej rreth 1.2 trilion dollarë, duke u rritur 2.1% krahasuar me 2024.
Ai gjithashtu ka kërcënuar se mund ta rrisë tarifën deri në 15%, por ende nuk ka nxjerrë një urdhër zyrtar për këtë, raporton BBC.
Vendimi i Gjykatës Supreme, me shumicë 6-3, gjeti se presidenti kishte tejkaluar kompetencat kur vendosi tarifat globale vitin e kaluar përmes Ligjit për Fuqitë Ekonomike Emergjente Ndërkombëtare (IEEPA).
Pas vendimit, Trump ka paralajmëruar për tarifa më të larta ndaj vendeve që “luajnë lojëra” me marrëveshjet tregtare të reja.
Ndërkohë, vende si MB, BE dhe India kanë deklaruar se po rishikojnë marrëveshjet dhe negociatat e tyre tregtare me SHBA-në, duke lënë të hapur mundësinë e masave reciproke, por pa dëshirë për një luftë tregtare.