Të hënën e 12 shtatorit, kryesia e Kuvendit do të mbajë mbledhjen e parë të sesionit vjeshtor, e cila do të nisë rreth orës 11:00.
Gjatë kësaj mbledhjeje, pritet të caktohet data e seancës së re plenare, ku në rend dite do të jetë shqyrtim i parë një sërë projektligjesh, në mesin e tyre edhe ai për ndryshimin dhe plotësimin e Ligjit për Skemat Pensionale të Financuara nga Shteti.
Disa nga pikat e papërfunduara nga seancat plenare do të jenë të parat në rendin e ditës, nder to edhe votimi në parim i Projektligjit për ndryshimin dhe plotësimin e ligjit për vetëqeverisje lokale.
Pjesë e rendit të ditës do të jetë edhe shqyrtimi i parë i Projektligjit për ndryshimin dhe plotësimin e Ligjit për Festat Zyrtare në Republikën e Kosovës si pikë e papërfunduar nga seanca plenare.
Po ashtu, në rend dite do të jetë edhe zgjedhja e një anëtari të Bordit të Radiotelevizionit të Kosovës, nga radha e komunitetit serb.
Kryesia në rend dite ka edhe pikat e papërfunduara nga seanca plenare e katër gushtit si votimi në lexim të dytë i Projektligjit për Qeverinë e Kosovës, votimi në parim i Projektligjit për ndryshimin dhe plotësimin e Ligjit për noterinë, shqyrtimi i Strategjisë së Sigurisë së Kosovës 2022-2027.
Pos tyre, në rend dite janë edhe zgjedhja e një anëtari të Bordit të RTK-së nga komuniteti shqiptar, shqyrtimi i rekomandimeve të dala nga shqyrtimi i raportit të auditimit për pasqyrat financiare vjetore të RTK-së për 2021 dhe raportit të auditimit të performancës “Menaxhimi i fondeve publike në RTK”, formimi i komisionit ad-hoc për përzgjedhjen e kandidatëve për një anëtar të Komisionit të Pavarur të Mediave.