Të hënën e 30 janarit do të mblidhet Kryesia e Kuvendit, ku në takim pritet të diskutohet për caktimin e seancës së radhës së Kuvendit të Kosovës.
Takimi është paralajmëruar të mbahet në orën 11:00, ku si zakonisht pritet të ketë konferencë për media nga shefat e grupeve parlamentare të kuvendit.
Ndryshe, mbledhja e fundit e kryesisë së Kuvendit të Kosovës, kishte dështuar për shkak të mungesës së kuorumit.
Në atë mbledhje, ishin paraparë të shqyrtohen disa pika të rendit të ditës për seancën e ardhshme, si dhe pikat e mbetura nga seancat e kaluara.
Sa i përket dështimit të mbledhjes së kryesisë së Kuvendit, shefi i Grupit Parlamentar të Partisë Demokratike të Kosovës, Abelard Tahiri, e ka quajtur neglizhencë të mazhorancës.
“Se sa është e rëndësishme agjenda parlamentare për këtë qeveri drejtuar nga LVV tregon faktin që mund ta imagjinoni se më 22 dhjetor e kemi pasur strategjinë për energjinë, i cili ka mbetur i pavotuar. Aq është i rëndësishëm për këtë qeveri sa që të mbesin dokumentet e tilla të pavotuara si një rezultat i neglizhencës, degradimit të punës së këtij kuvendi nga kjo mazhorancë”.
“Si parti opozitare kemi qenë konstruktivë, i kemi votuar shumicën e projektligjeve, por prapë ata që duhet të udhëheqin shihet se do të vazhdojë edhe më tutje me degradimin e punës së kuvendit. Janë lodhur aq shumë në seancën e kaluar saqë tashmë duhet ta bëjnë një pauzë disaditëshe deri t’i mbledhin energjitë. Agjenda parlamentare nuk duhet të trajtohet në formë të tillë, duhet të ketë fokus më të madh, sepse mazhoranca ajo që e dikton mbarëvajtjen e punës së kuvendit”..
Ai ka thënë se pa vullnetin e mazhorancës nuk mund të mbahet seanca për shkak të mungesës së kuorumit.